Naate mussewerk

Op zonnigmerge is dr nog lichte paniek beaj Frankie over de tied det we beajein komen. Is in principe al ut ganze joar hetzelfde, maar oke. Oeteindelijk zit hea ruum op tied in de kantine zien ontbijtje noar binnen te werken. Zelfs Kees is wederom ruum op tied, ut sjient zelfs zoe te zien det hea vanteveure nog beaj de Pool is geweest zoedet hea beaj un eventuele wijziging van thoes– noar oetwidstried auk nog op tied waas. Allein de 2 Roelies maken ut nog door oeteinlaupende redenen ff spannend, maar auk die stapte um 10:14 de kantine binnen. Tim “Pipe” Pilon is bereid gevongen um os middenveld vandaag te versterken. Door ut tekort aan centrale verdedigers mot ozze zelfbenumde Roelie Pirlo 10 langs Boele stoan achterin, woardoor dr un plaats op ut middenveld vreaj kumt. Ierdere probeersels um ozze aanvallers doar neer te zitten waren gin onverdeild succes. Dus is Pipe zien aanwezigheid zeer welkom. Auk Koeiekop is dr vandaag neet beaj, ut sjient det hea unne fotoshoot heat veur de Hunk kalender van Proud Farmers.

De widstried van vandaag is tegen Brevendia 2. De nummer 2 teage de nummer 3, mit 2 puntjes versjil. Unne onvervalste topper dus. En beaj H3 zien ze de irste widstried van ut seizoen natuurlijk neet vergeate. Deze ging mit 1-0 verloren en alles wat blauw wit waas vong det we doar toch redelijk “geneajd” zien door de scheids. Slechte verlezers? Mesjien wel, maar we goan dr alles aan doon um wat doar is gebeurt, recht te zitte. En zoe ut gaat noar 5 punten te vergroëte en de druk op Bree te hoije. De belangen van vandaag zien dus helder en zoe goan we auk de warming up in. Dea overigens prima oetgevoerd werd. En auk nog un eervolle vermelding veur Tiesse, dea veur ut irst de hoedjes good heaj stoan. Vurrige weak waas hea al dichtbeaj, maar vandaag waas ut perfect, hulde!

Vanaaf de irste minuut waas eigenlijk beaj beide plooge duudelijk wat de insteak vandaag waas, winst! Brevendia heat in ut begin mier rust aan de bal en pakt zoe un licht overwicht. Echte kansen weare dr neet oetgespeuld trouwens. Ein onoplettendheid beaj Burb zorgt veur un groëte kans veur “die angere vieze greune”. Un lange bal liekt Birb aaf te sjerme en hea wacht op Pis, maar dea bal valt un bietje doed en de aanvaller van Brevendia kumt veur Burb en steit zoe 1 teage 1 mit Pis. Gelukkig veur Dörp geit ut schot veurlangs Dit liekt unne wake-up call veur de blauwe. Ut spelbeeld dreit um en we komen beater in de duels en speule mier op balbezit. Unne aanval over rechts via Ruben dea ff royaal de brommer aanzit en alles en idderein dr oet lupt, op de achterlien hult hea good ut overzicht en bedind Tunke. Dea vervolgens oet de dreij de 1-0 binnen sjuut. Noa un good half oor hebben we de veursprong te pakke en moog Brevendia aaftrappen. De bal kumpt redelijk snel wir beaj Boele terecht. Dea steurt Kees in de deepte wig. Kees zukt ziene tegenstander op in de 16 en dea makt un overtreding op hum. Scheidsrechter van dinst wiest resoluut noar de stip. Inkele speulers van Brevendia protesteren nog wel, maar angere zeggen auk det ut gewoen neet zoe slum waas. Pingel veur Dörp. Det dit gin koad kunstje is, det weite de vaste leazers wel. Dr zien inmiddels al 5! speulers die gemist hebben dit seizoen. Noa un klein overleg is vriedig besloten det Tunke “gewoen” wir de penalties veir zien reakening nimt. Tunke geit achter de bal stoan, maar sjuut um wir zoe slap in det de keeper de bal teage hult. Ut juichen van de keeper is wel te begriepe, maar mesjien is ut slummer um irst te zorgen desse de bal heas, of det dea in idder geval wig is. Tunke kin in de rebound de bal mekkelijk binnen tikken en kin dus als litste juichen. Dit wurd neet hielemoal gewaardeerd door de keeper en dr onsteit un klein opstootje. Niks aan de hank, 2-0. Binnen 3 minuten 2 goalen is natuurlijk unne lekkere boost veur H3. Verder speule beide teams gin echte kansen mier oet de irste hilft en goan we dus mit un 2-0 veursprong de rust in.

Trainer Tiesse guft auk aan det ut irste half oor hiel onrustig waas en det in ut litste kwarteer duudelijk beater ging. Dus op dea voot motte we verder. Nog gin wissels aan Dörper kank.

Al vreaj snel in de twidde hilft wurd Ruben door Nicknack wiggesteurd en in de verdedigende actie op Ruben wurd ziene inkel gerakt. Of dit veurdet de bal gerakt wurd of doarnoa is neet hielemoal duudelijk, maar de scheids legt “um” wir op de stip. Tunke geit wir achter de bal stoan en sjuut de bal dit kier in eine kier langs de keeper. 3-0, wat een weelde. Kansen op de 4-0 zien dr via Frankie en inkele veurzitten die net neet aankomen, maar dan valt de goal oeteindelijk aan de angere kank. Te veul ruumte kriegt de boetespeuler van Brevendia en dea wit via unne hoejge veurzit de lange spits te bereiken. Mit unne kopbal van dichtbeaj teikend hea veur de 3-1. Ut zal toch neet det Brevendia nou blood ruukt. Hielemoal niks aan de hank, maar als de 3-2 toevallig valt kin ut nog raar laupe. Gelukkig keert de rust snel truuk en pakt Helden wir ut initiatief over. Un paar minuten tied kroegt Frankie de bal veur ziene perfect gestrikte linker en deponeerd de bal heerlijk in de lange bovenhook, 4-1. De sjonste van vandaag en auk ut litste wapenfeit van de widstried.

Alles beaj elkaar un goije overwinning veur de mannen oet Dörp, de beleaving waas auk vanaaf de irste minuut, en auk doarveur, wir good. Prima veldspel op ut irste half oor noa en genog kansen en dreiging gehad. Door ut mitspeule van Roelie P. witse op veurhank al det de 0 lastig wurd. Maar mit 1 goal tegen mogen we neet klagen. De bezeukers oet Stramproy zullen zeggen det de scheids erg op de hank waas van H3, maar de minsen mit unne blauwe bril op zullen zeggen det hea prima heat gefloten. De woarheid zal wel ergens in ut midden liggen. Maar gezeen de irste widstried dit seizoen, toen de rollen umgedreajd waren mogen beide teams niks mier zeggen.

Noa de widstried weare dr nog enkele herinneringe opgehald tussen speulers van Brevendia en Dörp. Zoe kosten sommige speulers elkaar nog van ut voetbalkamp in Heytse 20 joar truuk. En sommige heaje zich getroffe tiedens early hardcore fiëstjes. Super leuk! Verder zien dr nog get adresgegeavens oetgewisseld veur als Brevendia heur sportieve plicht duit. Mit 6 punten achterstand is ut trouwens auk nog mogelijk um gewoen kampioen te weare. Aangezeen dr nog enkele kampioenskandidaten elkaar treffen. De kratjes Jupiler stoan in idder geval al kloar as ut zoe wiet is.

Roelie P. heaj nog gehoopt op get naate mussewerk in de kantine, maar hea kwaam bedrogen oet. De verdeiling oet- en thoeswidstriede waas vandaag neet hielemoal 50-50, dus un doeie bedoeling in de 3e hilft. Opkomst waas auk matig door mooderdaag. Gelukkig (of neet) kwaam de sloopkogel ierder truuk oet ut zuiden en sloot hea nog ff aan um dr toch nog get van te maken.

Volgende weak wederom unne thoeswidstried veur ut derde. Meijel 2 kumpt dan op bezeuk. De irste widstried oet in Meijel ging moeizaam gewonnen, dus ondanks de ein noa litste plek zal ut wir un opgave weare um de 3 punten thoes te hoije. Tot zonnig de 15e!