Helje 3 wit wir wat verleaze is

 

Deze weak stong de widstried teage Maasbree op de rol. Helje kin zich vandaag plaatse veur de kampioenspoule en un plaats beaj de bovenste 4 veiligstille. Maar dan mot dr gewonne weare. Opzich gin probleem veur de blauwe, maar Maasbree is toevallig wel de litste ploog woar wea van verloren hebben.

Bobby heat veur vriedig un pittige training veurbereid, maar um 19 oor kriege we bericht det de velden blank stoan. Gin training dus. Wel steit dr unne fiëstoavend op de planning noa de training. Maar ja gin training, dus ut fiëstcomité zorgt det ut geweld al um half 8 kin beginnen. Hulde veur de flexibiliteit.

Dit is un widstried verslaag dus de details van deze oavend zal ik uch besparen. Ut spelke mexxe kint veule varianten, maar als eamus veurstild un de Meijelse variant te speule mosse ontiegelijk veul dorst hebben of kei hel wigrennen. Echt niks is good wat van die reserve brabo’s aafkumpt.

Daan de Neuker is dit kier op dezatterdigoavend neet beaj ut slotconcert geweest, maar wel beaj de liedjesoavend van de Dörper Kuus. Neat um noar die kwalitatief goije nummers te luusteren, maar um zelf mit te doon. En auk nog as leadzanger. Sjitterend!

Dan noar de zonnig. Trainer Tiesse kin op ut begin van de weak nog 16 man gebroeke. Tunke lut dinderdig weite det zien rib nog steeds neet hersteld is en det hea op ut bengske als noodverband wilt. Gin probleem, toch man zat. 5 minuten later kriegt Tiesse un belletje van ozze sponsor en collega verdediger Voorter. De kerstbuim motte de gronk oet en de verkauplocaties motte klaor. Gin voetbal veur Voorter dit weekend. Legitieme redenen um aaf te melden, en we hebben toch man zat. Op zatterdig toch nog un telefoontje. Ozze collega’s van Helje 2 hebben 2 speulers van os nuddig. Weekendjes wig weare lekker midden in het seizoen gepland en de (selectie)teams motte ut maar oetzeuke. Det is echt iets van de litste joare dink ich, want det heb ich noeit mitgemakt. Maar ja, we weare oad zullen we maar zeggen. Oude rot Boele wurd dan maar van de bank aaf gehald en moog starten tegen Bree.

Al mit al gin vlekkeloze veurbereiding. De tegenstander zal auk nog over gemotiveerd zien umdet die voetballen veur de litste kans um beaj de bovenste 4 te komen en natuurlijk ut rechstreekse duel um de titel hebben verloren veurig seizoen. Dit gezag hebbende plus get tips veur de 11 in de basis goan we ut veld op. Aanvoerder Nicknack guft nog ff kes aan det we de mekkelijke oplossing motte zeuke. Eigenlijk idderein valt van verbazing van de bank. Minse die mit de Nicknack voetballen of gevoetbald hebben weite wel wurrum.

Hup noar boete! Helje 3 begint de irste 2 minuten good aan de widstried. MVC’19 2 lut zich mier inzakken als angere kiere. Helje heat ut doar lastig mit en auk weare we slordiger. Maasbree pakt ut initiatief over en drukt mit de voorwaartse en middenvelders Helje flink truuk. We komen dr neet mier oet en de kiere det we det wel doon, maken we de verkierde beslissingen. In idder geval neet de mekkelijke. De drukt wurd mier en mier en de 1-0 valt oeteindelijk auk. Spits van dinst beaj Bree moog kappen en dreije in de 16 en via un snel toeperke geit de bal in de korte hook. Oei. Als dan neet hiel veul later de 2-0 auk nog valt dan is Helje ff stuurloos. Schelden en zannike op alles um os heen. Beweeg is! Speul dea bal gewoen normaal! Flikker toch op! Hoij diene kop! Ge wit ut wel. Det wilse beaj unne tegenstander bereiken en neet beaj dien eigen team. Wonder boven wonder komen we de litste 10 minuten nog 2x in scoringspositie. Rob kumt alla Robben op de keeper aaf en de keeper van Maasbree pakt de bal alla Casillias. Net neet dus. Struip slalomt zich nog unne weeg door de Breese moor en zien schot geit binnekank poal dr oet. Net veur rust nog unne aansloetingstreffer zou zeer welkom zien geweest.

De rust goan we dan mit unne zeer terechte 2-0 achterstand in. FF de boys hielemoal aafbranden um vervolgens mit broekbare tips proberen de widstried nog te kantelen. Unne ware aanvalsstorm wurd aafgesproke en hopen det de 2-1 snel valt. Ties kumt veur ScoopyStan in ut veld. Dea volgens Tiesse zien slippers nog aan heaj op ut veld. Ut waas neet best vandaag. Maar det is eigenlijk veur idderein van toepassing de irste hilft.

Deze mitgegeave taak wurd eigenlijk wel prima oetgevoerd en binnen un kwarteer kupt (???) Struip de 2-1 binnen. Unne werkelijk sjitterende kupgoal van ozze krulturk. Hoppa, truuk in de widstried. Sjors kumt nog in ut veld veur Burb, en dea moog vanaaf de rechtback positie proberen te aanvallen. Kansjes en veul druk, maar de goal valt neet. Tunke nog dr in veur Peute en ut is bijna 10 tegen 10 in de 16 van Bree. Wederom 2 kansen nog maar de Britse moor brikt neet. Veul ontlading beaj ut litste fluitsignaal beaj Bree en gelatenheid beaj Dörp. Op basis van de twidde hilft heaj dr mier in gezeate det zeker, maar als zonne irste hilft op de mat wurd gelag, dan mosse dich eigenlijk gewoen sjame. Ut heat mesjien wel te maken mit de aafgelaste training det de sjerpte dr neet waas, maar auk det moog gin excuus zien. Zoals unne oad trainer oeit wel ins zei: Uithuilen en verder!

Beide beentjes wir op de gronk en de woarheid is wir ff gezag tegen ein. Beaj de Pool werd nog ff (veur sommige get langer as ff) naogeproat. De oetslage op de angere velden waren eigenlijk neet ongunstig en hebben we nog 1 punt nuddig de komende 2 widstrieden. Dit is wel tegen de koplauper en tegen de nummer 4, dus we mogen os nog ff oplaaje en hopen det de training vriedig wel door kin goan, zoedet we volgende weak vanaaf ut begin wel sjerp zien.

Toedeledoki!