H3 op staum, of op diesel?

Deze manjigmorgen/middig wilt de verslaaggeaver beginnen mit ut bedanken van zien trouwe volgers. Unne constante straum aan appjes en berichten vanaaf zonnigoavend 22:00 oor, woar det verslaag blieft!? Nou normale minse hebben nog zoiets als weekend en motte gewoen werken op manjig. Sjilt det deze verslaaggeaver neet hielemoal normaal is en dus gewoen vreaj heat op manjig. Heurlijk! Aan idderein dea nou in de baas ziene tied dit aan ut leaze is geaf ich dan auk de tip um noar deazelfde baas te laupe en deze dan gewoen mede te deile desse veurtaan op manjig thoes bliefs. Nog unne tip, pak dich vanteveure un smintje of unne kauwgum zoedet dea baas auk neet ruukt desse gister op de kermis bis geweest. Nou good, idderein wilt gewoen un klein verslaag van de widstried van deze weak, dus loate we doar mer is get over sjrieve.

We starten deze kier op de vriedig. Neet de aafgelaupe, mer dea van un weak ierder. H3 heaj namelijk un vreaj weekend en dus stong dr un rustige training op de rol. Jong teage oad, in versjillende partijtjes en aafwerkvormen. Vakkundig verzonnen door veldtrainer Bobby. Ich zal de details achterwege loate en ut kort hoije. Oad wint, ondanks de niet hielemoal onpartijdige trainer. Klein blikje beer veur de verleazers, halve liter veur de oaje knarren. Lekker lekker.

Un weak later steit de vriedig in ut teiken um H3 veur te bereiden op SC Irene 2. Wederom unne hoejg aangesjreve tegenstander. Wel eine de we al 2 kier in de aafgelaupe 3 joar teage zien gekomen in de beker. 2x winst, maar ja beker… 2 seizoenen truuk hebben we nog mit mujte un punt weite te behalen teagen ut 3e ilftal van Irene. Dus we kinne aan de bak. Det is auk de zeen aan de training, woar werkelijk de scheensplinters dich um de oere vlegen. Trainer Bobby lut oeteindelijk ut partijspel onbeslist eindigen umdet hea bang is det we dr zonnig un aantal motte missen. Weam auch van geluk moog spreake is ozze Kees. Dea heaj deze weak nog ff unne tank leeg gezoge en nog get diesel gedronken. Gelukkig is hea nog net zoe snugger det hea noa zien nipje brandstof gin sigaret opstook.

Op zonnigmerge kriegt trainer Tiesse nog un last minute aafmelding van Voorter. Voorter dea op vriedig nog un teamuitje heaj mit zien blonde stagiaire en op zatterdig nog mit oad Helje 2 op paad is geweest waas echt zeek. Tuurlijk… Versjillende H2 speulers weare nog benaderd um beaj os aan te sloete, maar deze liggen nog allemaol sterre zaat in de bocht. Of hebben al angere verplichtingen. Dus we zien vandaag mit 13 man, mot genog zien. De warming up is van zo’n dramatisch niveau det zelfs koeiekop meujteloos mit heaj kinne doon. Niet best dus. Nou gauw noar binne en nog ff de broekbare tips van Tiesse in de oere knuipe. Hup die blauwe!

Binnen 20 minuten liekt de widstried eigenlijk al beslist. 3x beaj de goal van Irene komen en dan mit 3-0 veur stoan is unne prima start. Ties lupt door en liekt deze bal mit de erm mit te kriege, maar dit is veur de scheids moeilijk te zeen en hea mog dus door. Aug in aug mit de keeper faalt ozze Mini Fredje Lemmen dan auk neet. De 2e en de 3e goal door Ruben en wir Ties zien mier dan prima aanvallen die beheerst binnen gewerkt weare. Alles en idderein is eigenlijk mit stomheid geslagen mit deze tussenstand. Ut sjient zelfs zoe te zien det os centrale duo achterin ut allemoal wel hiel snel vong goan en ut eigenlijk neet hielemoal mier kosten volgen. Die van Irene trouwens auk neet, haha. Leuk grapje! Allein heaj det beaj ut dörpse duo niks mit de snelheid van ut spel te maken, maar mier mit de snelheid van ut beer op zatterdig. Helje guft eigenlijk wir niks wig en boete un paar schoten van 20/25 meater kumpt Irene neet. Boete unne staredown tussen unne speuler van Irene en Tunke gebeurd dr eigenlijk neet veul mier. Organisatorisch is ut gewoen prima geregeld beaj H3 en via ut sterke middenveld en aanval kriege wea altied wel kansen.

In de rust hameren we dr op det Irene waarsjienlijk flink druk geit zitten en det we zelf gewoen motten blieve voetballen.

De verwachte storm van Irene is waarsjienlijk boven de maas blieve hangen, want gevierlijk werden ze zeker neet. Allein mit un bietje noatrappen en doorlaupe op de Dörpse bein probeerden de Tegelse tegenstander os pien te doon. Det lukte beaj Ties, want dea mos zich loate wisselen noa ein van deze smerige charges. Sjorske dr in en we goan wir door. Ruben prikt ziene 2e dr nog in en auk Struip moog de wir eine beaj tillen. 5-0! Ongeluifelijk. Un paar minuten veur tied kriegt H3 auk nog unne pingel. Captain Tunke is dan al lang en breid gewisseld en dea zit lekker oet te kateren neave Koeiekop en de geblesseerden Ties en Nicknack. Teikenend veur de ontwikkeling van ozze dieseldrinkende Kees gunt hea Ruben de pingel um zoe ziene 3e van de daag te maken. Hup wir unne widstriedbal veur Ruben en de 6-0 steit op ut scorebord. Heaj blieft ut beaj en H3 duit wir goeie zaken in de competitie en auk veur de Zoefiecup.

De mannen van ut 3e kleppen dr nog un hiel deil wig in de kantine en op de kermis in Beringe. De mannen van Irene blieve nog in Dörp hangen um noar de irste ilftallen van Dörp en Irene te kieke. Onger ut bestillen van heur drankjes wurd nog gevroagd of ut scorebord nog aangepast kin weare. Ut deej de mannen namelijk wel pien um noar die 6-0 te blieve kieke. Oeteindelijk wint Irene 1 wel van Dörp, dus ze mogen oeteindelijk toch nog 3 punten mit truuk nemen.

Donderdigoavend mogen we nog aantreje in de volgende ronde van de beker. Oet noar Mierlo Hout, altied lekker!

9 oet 3 is natuurlijk wel hiel erg lekker en iets woar we van te veure eigenlijk neet over durfde te druime. Nogmaals sorry veur de vertraging vandaag, en nou wir gauw aan ut werk!

Ciao ciao!