Take a Bifi like a boss!

 

Ut is 25 september vandaag. De datum van de irste derby veur Helje 3. Vandaag steit de widstried teage de mannen van Baarlo 2 op ut programma. Un Dörp zeggen we Balder in Balder zeggen ze Boalder. Makt gin flikker oet trouwens idderein wit woar ut um geit. Boalder 2 wurd door os gezeen als ein van de kanshebbers veur de irste 4 plaatsen in deze inkele competitieronde. Deze plaatsen geave recht op un “kampioenspoule” en die angere plaatsen geave recht op un volledige competitie oet en thoes veur de kat zien kut. Vurrig joar waas de verslaaggeaver al neet te spreake over ut besloet van de KNVB inzake de promotieregeling noar de 2e klasse (leas vreaje insjrieving). Helje 3 heat ut samen mit Bree 2 lang spannend gemakt vurrig joar zoedet dr nog get um te speule waas, mit ut bekende resultaat det Helje 3 ut kampioenschap binnen heat gehald. Lekker man! Maar als de KNVB dan mer wir ut besloet nimt um volgend joar wir un vreaje insjrieving te faciliteren veur de 2e klasse, kinse dich aafvroage woar ze in Zeist (of Nieuwstadt) hielemoal mit bezig zien.

Nou ja genog gezeikt. Dit joar gin verslagen van de bekerwidstriede, puur umdet deze verslaaggeaver doar ginne zin in heaj. Ginne tied klinkt veur unne ambtenaar natuurlijk onwarsjienlijk. Teage Ospel 2 un moeizaam geliekspel, 3 trainingen en eine oefenswidstried (teage Altweerterheide 1, 11-1 joa dit waas veur H3 unne thoeswidstried…) en doarbeaj is Ospel 2 unne echt angstgegner veur os, til doar nog inkele vakanties en geboortes beaj op en ut resultaat is gewoen good. De weak dr op stong reserve hoofdklasser Venlosche Boys 2 op de rit. Joehaaj gewoen mit 3-4 op kunstgraas de punten mitnemen. Neet gestolen, gewoen good gevoetbald en gewerkt. Dan nog FCV 2, die de weak doarveur neet hebben gespeuld teage Ospel (Lekker as 2e ilftal van de booming vereniging van Vinnel) dankzij un fiëstje van Frankie dea wir un joar mier ervaring kin toevoegen aan zien leave, waas dit nog un hiele opgaaf. Neet vanwege de tegenstand, maar vanwege de drank. Oeteindelijk ging de kater wig en leep H3 oet noar un onbezorgde 6-0 overwinning. Verder in de beker dus, kutzooi. Maar goed veur zoever de veurbereiding.

Inkele vaste namen van vurrig joar zult gea dit joar (warsjienlijk) neet mier teruuk leaze. Boele heat zien widstriedsjoon aan de wilgen gehangen en traint wel nog altied fanatiek mit op de vriedigoavend. Stoutjes geit proberen de Um noar Dörp te halen en aaf un toe un putje beaj de veteranen mit te doon. Max geit veur studie/ stage noar Tilburg en duit ut get rustiger aan. En dan Timo dea mint det ut graas beaj de buren altied greuner is. Mosse wille…

Um ut vertrik van deze kla(t)sbakken op te vange hebben Tiesse en Koeiekop zich geroerd op de interne transferliest. Edwin “Edje” Heuvelmans kumt over van Helden 1 en vanoet de Jo19 komen Mark “Kalfkop” Peeters en Ties Lenders over. Reserve Rambo Stan van der Sterren heat auk de overstap gemakt vanoet Helden 1, maar helaas is deze vakkundig op tiedelijk voetbalverlof gesteurd in de widstried teage Altweerterheide. Dan kwaam dr nog un (b)engelke oet de hemel gevallen en det is Juul “Struip” Stammen dea noa 3 joar wir back in the game is. Kortom un drukke transferperiode, maar gelukkig heat ozze Koeiekop gin (koeie)flaters gemakt en gin dickpics doorgesteurd.

Truuk noar de widstried van vandaag…

Stan en Rob van der Sterren zien vandaag neet beaj de selectie wegens blessureleed. Jammer, want die kinse dr wel beaj hebbe. Maar good genog kwaliteit beaj de 11 die goan starten en wat dr op de bank zit um ut Boalder 2 in idder geval moeilijk te maken. Veuraaf kriegt Tunke van de aanvoerder det dr 2 pitchers beer klaor stoan veur de winnaar vandaag. Captain Boalder guft direct aan det die toch veur de Baolderse zien. As die van Boalder ozze verslagen leaze (en det doon die) dan weite die det Bobby oeit unne kier heat gezag det die van Dörp door un moor rennen veur beer. Dus dit is al un prima motivatie veur deze op papeer zwoare oetwidstried.

Vanoet beide kanten geit ut spel via de verdediging noar ut middenveld en beaj de aanval lupt ut vaak spaak. Neat umdet ut veurin neet lupt, maar gewoen umdet ut aan beide kanten good steit. Boalder en Dörp willen un bietje utzelfde spel speule. Lekker voetballen vanoet achter en dan via ut middenveld de voorwaartse bereiken. H3 liekt un iets overwicht te hebben via Ruben en Sjors die via de boetekank de backs van Boalder vaak de hiele loate zeen. Echt gevierlijk wurd ut neet. Achterin beaj H3 stoan Voorter en Tunke centraal en die lieke ut good veur mekaar te hebben. Pas in de 25e minuut valt dr un kansje veur Boalder te noteren. Kalfkop en Burb hebben ut op de back auk prima onger controle en zoe goan we mit 0-0 de rust in.

In de rust benadrukt Tiesse det ut good geit en det de ploog die de irste goal makt warsjienlijk auk wint. Maar good, Struip is kort veur rust mit get last gewisseld en lut in ut kleidlokaal wir zien waarde zeen. Kutte mit Roelie P. Zeike nog op de sjeids en bliekbaar stong dr nog un reakening open beaj Koeiekop en kreeg hea nog unne eimer koad water over zich heen. Kortom ut is wir lekker relaxt beaj H3 en de druk is wir van de ketel en van de bein.

Meaters maken, werken, coachen en voetballen det is wat we in de twidde hilft doon. Boalder sjuuft get wier op en kriegt dink ich 65 corners die neet hiel sterk genome weare en via ein van deze corners werken we de bal wig en kriegt Ties de bal en deze dreajt open en steurt Ruben (wederom op ut brummerke van vurrig joar) wig en dea kumt ein op ein mit de keeper. Dan weite we ut wel. 0-1! Lekker man. Boalder blieft aandringen en auk H3 blieft via de aanvallers speldenprikjes oetdeile. Boalder zit alles op alles, maar de Heljese moor zal neat buigen! Noa un minuutje of 92 flut de prima leidende scheids veur de litste kier. De irste 3 punter is binnen en Helje 3 pakt zie irste overwinningspils. Ohw, en nog de 2 pitchers van Boalder! Prima initiatief, maar helaas veur Boalder werkt beer, net zoals unne roeje lap veur unne stier, veur Helje 3.

Later wurd de widstried nog ff geëvalueerd beaj de Pool. Heaj knallen nog get Bitcoin-koningen in Porsche’s reserve influencers in aafgetrapte Audi’s veurbeaj. Overigens is ozze eigen Nicknack auk aan ut dinke um influencer te weare. Check ziene litse upload via https://youtube.com/watch?v=B-haTUHhI9w&feature=share en kiek hoe deze held noa un oavendje gehaktballetjes maken toch nog unne BifiXXL mit ducktape van de Gamma (let op deze tekst bevat productplacement) via de tuin in ut zolderraam goijt.

Volgende weak mogen we thoes teage Zerum 2 en dan hopen we det de Nicknack minimaal 20 views dr beaj heat.

Ajuu Paraplu en tot volgende weak!