Back in the game!

 

 

Biste leazers en leazerinnen,

We zien dr wir! Nou unne tied van mediastilte kroepe we toch wir in de spreakwoordelijke pen. Ut dramatische nivo van Valentijntje Driessen van de aafgelaupe tied, lut de verlsaaggeaver inzeen desse gewoen sjiët aan alles en idderein mos hebben en gewoen dien dink mos sjrieve en of zegge. De plus minus 167 steunbetuigingen, bloome en cadeau’s veur de kinger speule natuurlijk auk mit um te besloete toch mer wir un verslaag te sjrieve. De oprichting van de MHG (MediaHeldenGroep) woarin speulende zaken en bepoalde verhalen weare geverifieerd is natuurlijk auk unne goije stap in de richting. Mit ut motto; “Same stoan we sterk veur unne haup onzin”. Kiepevel! Hopen det we in deze donkere dagen veur kerst minse neet mier teleur hoove te stille, en gewoen ilke (leefst) manjig unne bak flauwekul op heur sjermke te presenteren.

Deze weak steit in ut teiken van de litste widstried in ozze irste halve competitie. Woar wea os vurrige pot geplaatst hebben veur de kampioenspoule. Wat un prestatie! Mit un bietje medewerking vanoet angere velden zou ut zelfs nog zoe kinne zien det H3 als winnaar oet deze poule kumt. Det zou get zien…

Um irste te weare mot dan wel van Venray 2 gewonnen weare. Gin mekkelijke opgave want auk Venray heat 16 oet 7, net zoals os. En auk Venray zou gear zoe hoejg mogelijk willen eindigen, dus det belooft get.

Op vriedig un iets aangepaste training ivm de widstried van ozze Oranje Leeuwen teage Messi en co. De aanvangst tied van 18:30 waas veur sommige speulers helaas neet haalbaar en zo waren we mit 11 man op de training. Onger de training kwaam Koeiekop nog ff melden det Frankie un ongeluk heaj gehad, allein mer blikschade gelukkig. Dit bleek toch wel iets mier as blikschade te zien en is Frankie wir 1 van zien 7 katteleavens kwiet. Gelukkig is allein de auto total loss en en waas ut unne Volvo en ginne Fiat Panda (mit alle respect Struip), en is ozze Frankie dr zonger al te veul kleerscheuren vanaaf gekomen. Noa de training vloog idderein noa zien locatie um noar unne pot voet- of volleybal te kieke. Helaas hebben “we” ut neet gered, maar we hebben gevochten veur wat we weard waren. Maar goed katertje incomming in idder geval.

Op zonnig heat Trainer Tiesse wir de nuddige kopzorgen. Nicknack en Voorter zien dr neet beaj, mer veur de rest un complete selectie. Wat is dan ut probleem zouse dinke? Bepaalde aafsproake willen we noakomen, mer det zou auk beteikenen det we op veul posities teveul motte sjuuve. Maar goed, ut is allemoal wir good gemanaged door de trainer en de betreffende speulers wurd ut ein en anger oetgelag. Prima. Vleugelflitser Sjors kriegt get mier ruumte veur zich en sjuuft noar de rechtsback positie. Volgens Scoopy en Kees kin idderein det. Maar Sjorske zou ut wel prima invullen trouwens.

Warming up waas neet hiel biezonger allein noemenswaardig is de black out van Scoopy tiedens de aafwerkvorm. Kwaam door de aanwezigheid van bruder Kees zoe zou later opgebiecht weare. Super grappig! Tenminste alse dr beaj waas geweest.

Veuraaf wurd nog ffkes aangehald det we warsjienlijk un hiel good voetballende ploog teage kriege en det we de borst naat mooge maken. Die oetdaging goan we natuurlijk neet oet de weeg! Op ut punt van beginnen wurd nog opgemerkt det dr un gaat in ut net zit. Spoedreparatie, want stilstaan is geen optie mit dea koaje wind. Verder waas ut natuurlijk prima voetbalwear, langs de kank zal dit natuurlijk angers ervaren zien.

Al snel wurd duudelijk det Venray ut mier op de counter gojt. Snelle boetespeulers en unne spits dea zich ver lut inzakken. Opzich un speltype welk H3 wel redelijk wit te bestrijden. Noa un klein kwarteer de irste corner veur Venray en ut is direct raak! Slecht of neet mitlaupe mit de ingels spreakende parel van Venray beteikend un vreaje kupkans. 0-1. Hoe is ut toch ilke kier mogelijk, man man man. Dit kumpt de spel intenties van Venray natuurlijk allein mer ten goede. Blieve counteren en H3 die motte komen. Nou wilt ut toeval det we wel redelijk mit un belke overweeg kinne en via os middenveld en en veurhoede steeds gevierlijker weare. Enkele prikken weare oetgedeild door de Dörpers en als Scoopy veur de 3e kier langs ziene tegenstander glipt, kin deze zich neet inhoije en werkt Scoopy noar de gronk. Pingel veur H3. Captain Tunke pakt net zoals Harry Kane zien verantwoordelijkheid en sjuuft de pingel beheerst binnen. 1-1. Helje drukt um nou door en blieft aandringen op de goal van Venray. Ruben dolt auk nog ff get tegenstanders en auk doar zeen de verdedigers gin angere optie als unne sliding inzitte. Prima idee, Ruben neer en wir unne pingel. Tunke knalt auk deze overtuigend tegen de touwen en zoe dreaje we binne 10 minuten de widstried compleet um. Eddie bezorgt de keeper van Venray nog un oeterste inspanning door unne bal lekker op de volley te pakken van un meaterke of 20. Keeper tikt deze bal nog net oet de kruutsing. Det waas mich un goal geweest, maar helaas. 2-1 is dan auk de rust stand.

In de rust geit ut eigenlijk mer hiel kort over de widstried en de meeste tied geit in de wissels zitten. Koeiekop belooft idderein un basisplaats in ozze litste widstried van dit joar, volgende weak teage TSC’04 veur de beker. Oeteindelijk blieve Burb en Ties spreakwoordelijk achter in ut kleidlokaal en komen Kees en Roelie P. dr in.

In de twidde hilft kiest Venray veur un iets angere aanpak en lut de spits neet mier inzakken, maar juust mier de boetekank opzeuke um zoe ozze verdediging oet ein te trikken. Coachen en rustig blieve, dan is dr auk nou niks aan de hank. Nou un 15 minuten knalt Kees de bal mit links op goal en de keeper verslikt zich in de bal en zoe geit deze houdbaar liekende bal toch in de goal. 3-1. Dit is ut moment det Venray eigenlijk nog mier druk noar veure geit zitte en zou H3 flink onger druk motte komen te stoan. Peute en Guus (H2 bedankt) vallen auk nog in. Maar behoudens inkele ballen die dr door komen, weare de mannen oet Venray eigenlijk neet gevierlijk mier. Eddie pegelt oeteindelijk nog de 4-1 tegen de touwen en zoe is de widstried eigenlijk gespeuld. Allein reserve Spiderman mint ut nog spannend te maken door eigenlijk mit inkele Dörpers ruzie te maken. Sjilt det wea allemoal persoenlijk zoe gegrujt zien en det we gewoon un beker’ke pakken en deze hoes spin lekker in de bus vreajloate.

19 oet 8 det is helaas net neet genog um de rangliest op ut eind te mogen aanvoeren, maar natuurlijk wel un mier dan prima prestatie! Reden genog um ut irste vejeurdaagsvaat aan te sloete. Bietje jammer det de fiëstcommissie gin hoedjes en/of angere prullaria heaj geregeld um dit mega fiëst nog mier cachet te geave. Gelukkig (of neet) kin deze fiëstcommissie altied truukvalle op ut Meijels Mexxe. Of in idder geval un aaftriksel doarvan. Oei oei! In bepaalde kringen wurd Mexxe wel ins vergeleken mit unne bokswidstried. En alse mit deze Meijelse variant teage de touwe hangs, dan kinse echt zwoar de pisang zien. Sjitterend! Nicknack lut ziene freshe Despo nog stoan umdet hea thoes de pettetjes mos goan sjille. (Of iets in die richting…)

Zoals ierder al vermeld, volgende weak zonnig thoes de bekerwidstried teage TSC’04 2. Unne tegenstander dea wea dus al kinne en auk in de kampioenspoule tegen goan komen. Hopelijk duit ut wear good mit en kinne we goan proberen um os beker avontuur nog verder te rekken.

Tot de volgende