Soldaat Scoopy en zijn drieklapper

Noa os uitermate teleurstellend begin van 2023 steit vandaag de widstried tegen Merefeldia 2 op ut programma. Unne pot dea eigenlijk gewonnen mot weare willen we nog enige rol van beteikenis goan speule in de competitie.

Eindelijk mochten we op vriedig wir onger de bezielende leiding van Bobby ozze trainingsakker op. Helaas net gin 12 man beaj elkaar, maar mit un klein bietje sjuuve en improviseren lukt ut Bobby um de 11 die dr wel zien kloar te staume veur de zonnig. Tiedens de aafwerkvorm werd auk pienlijk duudelijk wurrum det we nog neet de punten hebben binnengehald die we eigenlijk woije. Mit kiep(er) Koeiekop in de goal waar dr nog steeds weinig juich momentjes te noteren. Maar goed, we blieve doorgoan en oeteindelijk mit un partijspel aafsloete. Allerlei aafmeldingen en doarbeaj de mannen die dr wel waren maar un flinke snotneus heaje, makte ut un training um snel te vergeate. Maar wel belangriek det we wir get hebbe gedoan. 

Op zonnig heat Tiesse wir de luxe um mit 16 man aan te treaje. Keeper Pis is de enige basisklant dea neet getraind heat en Struip is de enige dea wel getraind heat, maar reserve steit. Roelie P. duit dr overigens alles aan um op ut bengske te mogen beginne. Neet trainen, um 10:16 oor binnen laupe enz. enz. Als hea zich nou hie-le-moal de hik in gezopen heaj op zatterdig dan kinse doar nog respect veur hebben. Maar helaas van al zien wilde plannen is ut hum oeteindelijk allein gelukt om op de bank in slaop te vallen. Man man, wat unne mins!

De warming up begint eigenlijk utzelfde als de training. Ballen springen alle kanten op en de passing is alles behalve zuuver. Ierlijk is ierlijk, de staat van de velden is ronduit erbarmelijk te neume. Kin neames get aan doon en idderein heat doar last van, dus neet zeike. Gelukkig geit ut positiespel al iets beater en auk beaj ut aafwerken zien dr enkele sjoene goalen te noteren. 


Veur de widstried griepe Tiesse en Tunke ut moment aan um duudelijk te maken wat de belangen veur deze widstried zien mit betrikking tot de rest van os seizoen. Winst is ut enige wat tilt!

De widstried start en de groëte spits van Merefeldia lut zich inspeule op ut middenveld. Tunke dekt door maar zoe onsteit alle ruumte veur de middenvelder van Merefeldia, dea unne vreaje doortocht noar de Heljese goal heat. Gelukkig lupt dit mit unne sisser aaf. Maar det doon we dus neet mier. Langzaam maar zeker pakken we het initiatief in de widstried en deile we de irste speldenprikjes oet. Noa un kwarteer brikt ScoopyStan de ban veur de blauwe. 1-0. Via Sjors dea good druk zit kumt de bal oeteindelijk beaj Scoopy, via unne bekeken bal sjuut dea um in de korte hook en lut de keeper kansloos. Lekkeren nou doorgoan, wurd dr geroope. Merefeldia kumpt un kleine 5 minuten later via de links door alles liekt un menke te hebben, allein op de 16 steit dr toch nog unne geal-zwarte vreaj. Deze halt oet en de houdbaar liekende bal geot dr toch in! Ut zal toch neet wir hè.  Helden probeert wir verder te voetballen allein goan we wir te veul laupe mit de bal en komen we eigenlijk neet beaj Merelfeldia aan de goal. De tegenstander kumt wir via unne veurzit vanaaf links, dea door idderein gemist wurd, behalve de groëte spits dea de bal oeteindelijk beaj de twidde poal dr in frommelt. 1-2. Ut is echt um te huule det in 2023 gin kans van de tegenstander mier onschadelijk wurs gemakt en ut liekt det alles wat in de 16 valt un goal is. Totaal neet nuddig. Maar opneaj de sjouwers dr onger. Ut spel is vandaag minder als angere widstrieden, maar als we get mier druk noar veure goan zitten komen de kansen vanzelf wel. En zoe kumpt auk wir de 2-2 tot stand. Via de hiel erg matige opbouw van Merefeldia kriege wea wir balbezit. En wir is Scoopy ut eindstation en makt de 2-2. Un paar minuten noa zien twidde goal wurd Scoopy wir gelanceerd en kumt 1 op 1 mit de keeper. Allein in plaats van doorlaupe kiest ozze soldoat veur un schotje van un meaterke of 25. Wig kans! Det mot beater en det wit hea zelf auk. Als dan un minuut later de bal hoejg beaj os in de 16 valt en Eddie al truuklaupend rupt det hea de bal neet mier kin kuppe hult H3 zien hart wir vast. Beaj de 2e poal knikt de verdediger van Merefeldia de bal in de verre hook over Pis. 2-3, ut is iets um moedeloos van te weare. We heaje mit 3-2 de rust in motte goan, mer ut steit 2-3. 

Al gauw steake we de kup beajein en roope we det we dit nog wel kinne umdreaje. Hoejg druk zitten en dan kinne die niks. Tiesse huurt dit allemoal aan en besluut doar nog ff unne donderspeech aan toe te voegen. Ophoije mit det gespreak van det doon we wel ff! Voer ut maar is gewoen oet en maak die kansen aaf! We speule veur de liste kans, maar doar is weinig van te zeen. Mit 2 wissels proberen we mier drang noar veure te kriege. Peute en Ties dr oet en Struip en Kees dr in. 

De felle woorden van Tiesse werpen zien vruchten aaf want binnen de 5 minuten likt de bal dr al in. 3-3, Kees zit good door en via via kumt de bal wir veur de bijna gouden klompjes van Scoopy. Deze knalt ziene 3e van de daag dr in. Lekker man! En det in ziene litste widstried. We hebben dr lang op motte wachten, maar goed. We zien hielemoal truuk in de widstried en hebben nog 40 minuten um de veursprong te pakken. Helden spult sterk en lut Merefeldia eigenlijk toe kieke. Ozze verdediging liekt auk wir op orde en enkele oetvalle van Merefeldia weare in de kiem gesmoord. Kees kriegt dan nog un neet te missen kans, maar hea kumpt neet good oet beaj de bal en kin helaas neet mier de goije richting geave. Net langs. Ut is wachten op de genade klap, allein weite we oet veurgoande widstrieden det ut dan auk zoemaar wir angersum kin zien. Gelukkig is Frankie van het mooie spel en showt hea zien Joga Bonito skills op de achterlien van Merefeldia. Als unne ware Braziliaan dolt hea 2 tegenstander op de lien en behult ut overzicht. Struipie steit op de goije plek en zorgt dan auk veur de 4-3. Merefledia geit dan aanvallend wisselen en bringt unne extra spits. Nou doar waas weinig spits aan, maar goed. Ut sjient det dea man wel unne aardige knal in de bein heat en det hea moeilijk van de bal te kriege is. We zien gewaarsjuwd. "Scheids, hea trikt mich gewoen de boks oet!" Buldert Kees nog richting de leidsman. Dea wilt heaj niks van weten en we voetballen door. Ut is duudelijk det beide teams dr alles aan doon um de punten deur te verkaupe. Maar oeteindelijk trikt Dörp aan ut langste eind en is de irste 3 punter van 2023 un feit! 

In ut kleidlokaal lost Peute zien belofte in. Beaj winst zou hea un speciaal einmalig solo optreden verzorgen van ut geweldige nummer Sjorpaol. Ut is trouwens ronk oet van de zotte det dit nummer neet beaj ut LVK te huure waas. Maar goed, auk doar viert corruptie hoogtij. Makt veur os niks oet, want ut muzikale talent sjud mich ff un optreje oet de mouw, doar wurse bang van. Ut gemaak woar dit multi-talent zien publiek mit op de banken kriegt is mer veur weinge wiggelagt. Eamus mit un anger talent is Tiesse. Beaj gebrek aan rechterhank Koeiekop verzorgt hea dit kier de overwinnigspils. Good veur os, maar jammer veur hum. Hea mist ut optreeje van Peute, jammer joh! Kees kriegt als vanouds wir unne pils dea nog van vriedigoavend is blieve stoan en de sjeale wazelkaravaan kumt wir op gang. 

De 3e hilft zal zich veur un groët deil aafspeule beaj de receptie van Prins Graat. En ondanks de kekke blauwe stappers van de verslaaggeaver, "Metalic, je weet toch...", schitterd deze door aafwezigheid. Auk de Nicknack lut deze gelegenheid sjeete. Of det door ein versjoove blukske van ziene 6-pack kumpt of umdet hea mot goan chillen mit zien gamefriends oet Ingeland is neet gans duudelijk.

Wat wel duudelijk is, we hebben wir getraind en de punten zien binnen. Dus Bekker ut likt neet aan dich. De vastelaovend steit veur de deur dus volgend weekend gin voetbal. De weak dr op steit auk nog niks, maar det kin zoemaar verangeren. Mesjien wel allein pingels nemen tegen TSC, weam zal ut zeggen. De KNVB heat oetspraak gedoan noar aanleiding van de gestaakte widstried teage de Tegelse formatie. Conclusie is det ich doar niks iver goan zeggen allein det het restant mot weare oetgevoetbald. Dus weam wit! 

De groete en vier vastelaovend als unne gek. (Of neet alse get angers geis doon)

Ps. Als gea al un bietje (veul)  hebt ingedronke, zeuk dan op youtube ff noar "Sjorpaol". Succes gegarandeerd!