We love you Helden...

Biste belangstillende,

Aafgelaupe vriedig kregen we gelukkig un training mit de bal. Dinsig voetballen beteikend det Bobby un rustige training veur sjotteld op de vriedig. Joa ut was mit de bal en joa ut waas op un redelijk rustig tempo. Maar de oefeningen waren wel van middenlien tot achterlien. Dus we hebben ozze kilomeaterkes wir gemakt. Overigens trainde wea op veld 3 ivm ongerhoad aan de trainingsvelden. Dieke pluim veur ut veldbeheer in Dörp want veld 3 loog dr retestrak beaj. Nea dit is gin grapje. In combinatie mit unne bevlogen veldtrainer is dr eigenlijk niks sjonder als det. De bal liekt te zweven over ut veld en blieft fijn in un rechte lien rollen. Tenminste alse de bal good raks. Kick B. trainde veur ut irst in joare wir ins op ut veld mit umdet hea os op zonnig oet kumpt helpen. Hea is ut voetballen nog neet verlierd, maar de training zou um neet in de koaje kleijer goan zitten. Hielemoal gesloopt waas hea, rustige training wurd dr dan gezag...

Door de winst van PSV zatterdigoavend kos Feyenoord gin kampioen weare. Dit beteikende veur H3 det we mit 13 man aafreisden noar Venray. Pedro kwaam os auk nog oethelpen umdet hea nou toch neet noar Rotterdam hoofde. En speuler nr.13 waas Koeiekop (allein in oeterste noëd). Venray is de tegenstander dea os eigenlijk als enig team volledig kansloos achter heat geloate de vurrige widstried. Sterk aan de bal, snelheid en un prima verdediging makt ut unne hiele sterke ploog. Allein steit Bruheze nog ein plaats hoejger dan de mannen oet Venray. De brabo's koste vandaag zelfs zonger te speule kampioen weare. Dan zou Venray punten motte loate liggen teage os. 

De veurbereiding op deze widstried waren dus al neet hielemoal je-van-het. Blessures van Nicknack, Voorter en Kees. Werkvakantie van ScoopyStan en weekendjes wig van Struip en Peute. Totaal nog mit 10 man. Maar mit de aanvulling van de 3 ierder genumde mannen hebben we oeteindelijk genog man um te ballen. Die ballen waren we in Dörp al bijna kwiet. De auto woar deze achterin logen heaj nog get extra downforce nuddig um wog te komen oet Dörp en reej dus mit de achterklep nog open richting Venray. Lekker man. Niks verloren dus gauw wir doorrieje. Iets aan de late kank wegens landbiuwverkier en slechte navigaties komen we oeteindelijk iets veur 12 aan in Venray. Gauw umkleije en aan de warming-up beginnen. Eenmaal boete bleek det de staat van de velden in Venray werkelijk sjandalig zien. Op veld 4, volgens de trainer van Vemray auk nog ut minst slechte veld, begosten we aan de warming-up. Zoe ongeliek als dit veld dr beaj loog, ongeluifelijk. Zelfs ozze trainingvelden zien beater um op te voetballen dan deze wei. Maar goed, det hoof natuurlijk neet in os noadeil te zien aangezeen Venray 2 un mekkelijk voetballende ploog is. Fies vittig benauwd is ut auk nog deze zonnigmiddig um ut fiëst compleet te maken. 

Veuraaf wurd nog ff duudelijk gemalt wat we allemoal mogen verwachten vandaag en hoe det we ut proberen te goan doon. Pedro start in de basis en Kick en Koeiekop zien de 2 reserves, of zullen we nog ergens unne 3e vanaaf kinne toveren... Later mier heajover.

De widstried begint en eigenlijk geit ut vreaj geliek op. Venray zoals verwacht sterk aan de bal en loerend op de steakbal, dea vreaj aardig onschadelijk gemakt wurd. Aan de angere kank kriege wea auk wel get ruumte dus dr onsteit unne leuke widstried zonger det dr hiele groëte kansen ontstoan. 

Als dr noa un good kwarteer un blauw wit schot geblokt wurd, kumt deze op randje 16 veur de veut van Ties. Nou dan witse ut wel de litste weaken. 0-1. Deze treffer wurd neet allein door de Dörpers gevierd, maar auk doar Bruheze 2 die in redelijk beschonken staat (of gewoen knettah gek) auk langs de lien stonge. We love you Helden, we do! Klonk ut meermaals vanoet de zijkank van ut veld. Sjors kroegt doarnoa nog un kans, maar ziene knal wurd onschadeljjk gemakt door de keeper van Venray.

Noa un goaje 20 minuten wird de Peter Parker van Venray deep gesteurd. Tunke ( door Bruheze Jaap Stam genumd) positioneerd zich beater dan dit stripfiguur en is sneller beaj de bal. Keeper Pis is auk alert en duikt nog veur Jaap en Spiderman. Spiderman knalt dr nog ein klein webje oet en duwt Jaap nog ff in de ruk, net op ut moment det Pis de bal wig pakt. Jaap kin gin kank mier op en knalt mit zien bovenbein tegen Pis ziene kop aan en dus likt deze groggy op ut veld mit un bloodneus dr beaj. Wisselen... maar ja wea zien al bleaj det we reservespeulers op de bank hebben vandaag, dus unne reservekeeper zou hielemoal luxe zien. Neet dus. Koeiekop keept aaf en toe wel op de training mer det is gewoen gin optie. Ronnie Voorter wurd genumd um te bellen, maar veurdet dea uberhaupt in Venray zou zien, is ut al zeker 14 oor. Auk gin optie dus. Vlagger Sjhars kin wel un redelijk belke stoppen weite wea oet ut verleden en hea wilt wel de handsjoon aantrikke. Mit allemoal geliend greij zuut hea dr oeteindelijk auk nog wel als unne echte keeper oet en kinne wea verder. Oh ja, Spiderman dee niks verkierd zei hea. Nou dan is Batman vanaaf nou miene favoriete superheld en hoop ich det Mega Mindy dich unne kier aanpakt asse mit dichzelf in de knup zits! Det zal dich liere...

Veur dit moment stonge we al redelijk onger druk dus de verwachting waas det ut wel hiel zwoar zou kinne weare nou. Oeteindelijk kriegen wea via dribbels van Ruben nog wel get kleine kansjes maar scoren doon wea neet. Venray dringt aan, maar boete wat rollertjes langs de goal en get corners komen die auk neet. Noa ut rustsignaal weare wea wederom luidkeels toegezongen door de Bruheze speulers die de kantine maar gingen opzeuke. 

In de rust steake we de koppen beaj elkaar en pakken we de rust. Ut zal nog 45 minuten sjravele weare en unne stortvloed aan aanvallen van Vemray zien. Beaj balbezit proberen zoelang mogelijk de bal vast te hoije en dan maar kieke woar ut schip strand. Kick vult de training van vriedig nog dus dea blieft nog ffkes op ut bengske zitten en Koeiekop uiteraard auk want dea wilt gaar neet mitdoon. 

Unne pitcher Ranja later stoan wea wir op ut veld. Die van Bruheze hebben warsjienlijk 5 pitchers beer wiggetikt in de rust, logisch natuurlijk!

Ut is un stuk onrustiger in de twidde hilft en we komen eigenlijk zelf neet mier aan voetballen toe. Rollertjes recht op Sjhars aaf en schoten die langs of over goan is eigenlijk alles wat Venray wit te bereiken mit heur veldspel. Ut liekt dus redelijk onger controle ondanks de groëte druk. Burb heat ozze lieve heer tegen in de twidde hilft en Jezus wat is dea snel. Maar gelukkig makt hea un aantal verkierde keuzes dus echt gevierlijk wurd dea auk neet. Nou un 20 minuten liekt H3 iets mier controle truuk te pakken en kumt ut zowaar nog aan voetballen en counteren toe. Ties sjat unne bal beater in dan ziene tegenstander en hea kin zoe noar de goal doorlaupe. Hea wurd vastgepakt en geit liggen. Vrije trap en mesjien heaj de scheids wel un kaartje mogen trikken. En dan neet de geale, want dit waas gewoen unne doorgebroke speuler neer halen. Als vervolgens Ruben 3x en Eddie auk nog gesjupt weare noadet ze de tegenstander veurbeaj zien kumpt de terechte vroag of de scheids wel zien kaarten beaj heat. Ut hoof echt gin kaartenfestijn te weare, maar zo'n bewuste overtredingen zien gewoen un kaart weard. Ut is wachten tot de volgende op ut blessurebankje kumpt te zitte zoewe. Maar goed, we stoan nog steeds veur en auk de mannen van Bruheze weite det ut neet hiel lang mier deurt. 10 minuten veur tied kumt Venray via rechts door en de speuler wilt unne strakke veurzit geave. Mede door ut geweldige grasmatje verangerd deze veurzit hel in de korte hook. Kon Sjhars niks aan doon, want idderein verwachtte unne veurzit, zelfs de doelpuntenmaker. 1-1. Dan wurd ut nog ff spannend, maar oeteindelijk pakt H3 oet beaj ut groëte Venray 2 un verdind punt. Kick duit nog un goaje 20 minuten mit en auk Koeiekop (Bruheze vingt ut mier unne Buffel) duit nog ffkes mit. Al mit al, un bonuspuntje woar wea neet zoe veul aan hebben, maar wea goan heajdoor wel minimaal als 6e eindigen in de kampioenspoule van de 2e!! Klasse. Weitende det we in de irste widstrieden tegenstanders beaj vlagen hielemoal dolgespeult hebben, maar gin 3 punten hebben gepakt, dan heaj doar nog mesjien wel mier ingezeate. Maar oeteindelijk steise woarse huurs en dan is det veur un 1x in de weak trainend team un mier dan behuurlijke prestatie. 

Noa aaflaup direct de felicitaties aan Bruheze 2 die toch wel mit overmacht kampioen zien gewore. Wea kriege nog inkele pitchers van de mannen veur ut doon van ozze sportieve plicht en springen doarnoa de douche in. 

Rest os nog 2 widstrieden dit seizoen. Volgende weak de litste thoeswidstried tegen IVO die nog un plaats boven os stoan. Auk doar goan we proberen nog overheen te klummen maar 5 punten in 2 widstrieden zien dr nog veul. Maar we goan os bist doon. En zeker um mit un good geveul aan de bbq te beginnen. De litste pot is over 2 weake oet noar de kampioen Bruheze trouwens.

Kom zonnig allemoal kieke, want ut zal veur un aantal de litste thoeswidstried in H3 zien. Tot zonnig en neem groëte dorst en good wear mit!

Ciao ciao!