Beater unne oaje kapotte as unne jonge versleten!

Noa un weak welkome rust mocht ut 3e vandaag aantreaje teage Veritas. Aangezeen ut 2e vandaag vreaj heaj mochten Knip en de Witte hun opwachting maken in os team. Knip mocht Pis vervangen dea nog last heat van unne pienlijke sjouwer, en de Witte mocht noa 12 minuten (of zoeget) invallen um de geblesseerde Boele te vervangen. Kort doarop valt auk ozze “Nu even niet!” Sjors oet. Wat un gehannes wir. Piëters, deze weak wir truuk op zien oaje stekkie als assistent trainer umdet trainer Tiesse dit weekend wel wir tied heaj um os te coachen, lupt ut complete sportpark aaf um nog unne extra reserve te zeuke. Oeteindelijk wurd Ola gevongen dea nog op ziene taxi stong te wachten op de parkeerplaats. Dus mit eine reserve extra op de bank gingen we de volgende 70 minuten in. Burb, net oet Dubai truuk gekomen mocht dr veur Sjors in komen en eigenlijk mit zien irste balcontact speult hea Tunke vreaj in de 16. Deze blieft hiel rustig en zorgt veur de 1-0. Volgens trainer Tiesse bleef Tunke wel hiel rustig en dacht hea det ut neet good zou aaflaupe. Maar ierlijk is ierlijk dit kumpt natuurlijk umdet deazelfde Tunke veur ut irst in 20 joar senioren voetbal mit truuk mos beaj corners, dus mesjien det ut doar wel aan likt. Makt verder niks oet. 5 minuten later moog Burb aanleggen veur zien irste schot op goal en auk deze geit dr in. 2-0! Ozze sjeik Burb valt dus heerlijk in. We kriegen nog enkele kansjes, maar helaas mogen de mannen van Veritas neet nog unne kier aaftrappe. Greken kosten de mannen van Veritas trouwens wel als de biste in ut vervolg van de irste hilft. Waarsjienlijk is Veritas qua ervaring (leas oad) un team wat zelfs H3 ut noakieke guft. Maar goed, fijn det die oaje reserve Belgen nog zoe fanatiek zien det ze de scheids de sjuld van alles geave op un gegeave moment. Maar  feit is det ut 2-0 steit veur Dörp en det scheidsrecter van dinst gin ein van de 2 goalen heat gemakt. Dus det is wel un bietje mekkelijk. 

In de rust bespreake we wat good geit en wat minder good geit. Conclusie is eigenlijk det dr hielemoal niks aan de hank is en det we de widstried volledig onger controle hebben. Dus gewoen doorgoan, en proberen ut veld iets mier breid te hoije. Voorter kumt dr nog in en hea mot samen mit Roelie maar kieke woar dea geit voetballen???!! Door mer get! Oeteindelijk noa unne steen-papier-schaar moog Voorter rechtsback goan stoan. 

De twidde hilft is dr eigenlijk eine dea we snel kinne vergeate. Dr wurd neet mier gescoord al kinse dich wel aafvroage hoe det mogelijk is. Ongelogen dink ich det we wel 4 100% kansen hebben gehad en nog un aantal iets klindere kenskes. Oei, doar heaje we dr wel get mier mogen en/of motte maken. Maar umdet Veritas weinig tot gin stoetkracht heat loate zeen kwamen de blauwe gin moment in de problemen. Woardet de veurgoande widstrieden de verdediging van H3 aaf en toe piepte en kraakte, stong deze vandaag als un hoes. Onger leiding van Stoutjes dea nog get last heaj van de lauwe blikken Schultenbräu van de Lambertusstraot, wisten hea Peute, Timo (2e hilft Voorter) en Knip de 0 veur de irste kier over de streep te trikke. Speult H3 mit 3 man achterin vrugse dich aaf? Nea, mer Roelie duit auk neet mit  in ut vieren van de goalen die we maken. En mesjien heaj dea Roelie wel hielemoal neet mier op ut veld mogen stoan. In de irste hilft makt Roelie namelijk in smerige overtreding die neet as zoedanig is beoordeilt door de scheids. Maar de videobeelden (die dr sinds dit weekend wir zien op ut hoofdveld) zeggen wel get angers. Grapje natuurlijk auk Roelie spulde unne prima pot. Al mit al heaje we vandaag noa 35 minuten beater kinne stoppen mit ut gesjravel over ut veld. 

En ja ons moeder zeej nog
Doe dat nou nie maar ik dee het toch

H3 duit dus goije zaken vandaag en hult de aansloeting beaj de bovenste plaatsen. Hopen det de blessuregevallen volgende weak wir mit kinnen doon en det we mesjien wel veur ut irst dit seizoen compleet zien.

Man of the match: Stoutjes (pakt ut halve literke auk ff lekker)