C'est Oui

Zoe als de titel al verklapt, ut sleit nergens op! H3 in de neaje samenstelling heat ut redelijk gedoan in de veurbereiding (leas beker). Volgens de tc is ut 3e gin selectie ilftal mier want dr komen gin speulers van ut 3e mier in aanmerking veur de selectie. Allein mer oad volk. We hebbe dit joar un jasje oetgedoan door ut vertrik richting voetbalpensioen van Eddie, Voorter, Pis en zelfs Roelie P.. Til doar ut vertrik van Rob “why always me?” en Ruben noar de selectie. Huh? Gin selectieilftal toch? Maar goed. 1 maal winst en 2x verlees veur de beker. Vanoet de krochten van ut amateurvoetbal hebben we Kick B. nog weite te strikke. Zelfs Kersten vanoet ut twid, wilt tussen ut klussen door nog wel unne kier mitdoon. Of mot ich zeggen tussen ut zeuke noar klusvrouwe? Bis dich un vrouwmens tussen de 20 en 40, zuuse dr good oet en witse wasse mit unne hamer mos dan kinse dich aanmelden via [email protected]. Overnachting wurd geregeld trouwens.

De vriedigoavendtraininge weare neet mier verzorgd door Bobby, want auch dea heat de stap noar de selectie gemakt. Goeje keus trouwens. Tiesse/Koeiekop motte op de vriedig de Bobby oethange en det is natuurlijk wel un versjil. Ut zal dus mier vanoet de speulersgroep motte kome. Gin probleem , oad en wies genog!

Sjhaaaars waas vriedig nog ff fris. (Gekapt door de barbersjop van zien zaalvoetbalvrinde). Zannike op alles wat los en vast zit op de training door idderein. Det is al gin goije veurbereiding. Speegelke veurhoije en veural noar dichzelf kieke, mesjien beater.

Op zonnig heat Trainer Tiesse nog aafmeldingen van de Nicknack, De neuker en Tunke. Verder zal Itijlia langdurig op vakantie/leaveservaring in Italië zien dus de in de irste competitiehilft neet besjikbaar zien. Edje (gestopt, eigenlijk) en Sam van de A, (vreuger tenminste nou de Jo19-1.) helpen os oet. Super!

De oetwidstried tegen DESM 2 steit op de rol. Al snel wurd duudelijk det dit gin wereldploog is. Helaas hebben wea te weinig voetbalgeilheid um deze onkunde aaf te straffen. Ut is werkelijk um te janke wat beide plooge op de versjrikkelijke kunstmat te toon spreiden. Nul beleaving in ut veld en op de kansjes die ontstoan wurd neat sjerp zat gereageerd. Stan wird nog unne kier aangetikt maar scheidsrechter blindeVink van dienst zuut dr ginne pingel in. Gelukkig halen we mit 0-0 de rust en is dr nog genog um veur te speule.

Noa rust verangerd ut beeld eigenlijk neet en is ut werkelijk te sjandalig um aan te zeen. Boete inkele dieke kansen veur DESM die vreaj spel hebben gebeurd dr vreaj weinig. Stan wurd noa un 20 minuten in de 2e hilft duudelijk noar de gronk gewerkt in de 16, maar blindeVink wilt dr ginne pingel veur geave. Ein tikkie terug van JaapKersten is net/royaal te kort en zorgt veur de 1-0. Gauw genog doarnoa unne veurzit dea door de nr 9. van DESM ingekupt wurd. BlindeVink steit in de cirkel, mer zuut wel det de bal over de lien is. (Overigens waas de bal wel over de lien, mer alse duudelijke overtredingen aan de eine kank neet zuus, is het wel raar desse dit wel zuus vanaaf 40 meater aafstand.) Maar d’accord ut zal wel zoe motte en in os geval zulle we doar mit un groët aantal thoesfluiters deze competitie nog wel vaker tegenaan laupe. Al mit al waren wea zelf echt dra-ma-tisch, maar als de bal op de stip waas gegoan kos de wereld dr totaal angers oetzeen. We maken nog de 2-1 via Struip, maar de eindstand zal auk 2-1 zien. Gekke scheids duit nog get gekke dingen maar goed.

H3 start slecht aan de competitie en beaj un aantal zal ut kwartje motte vallen det ut neet vanzelf zal goan dit joar. Ut zal beginne beaj hel werke! Neet al te veul zoepe op de zatterdig , en taken oetvoere. Nog zeker gin man overboord op dit moment, maar mit zonne tegenstander heajse op 3 punten motte stoan. Hopen det idderein fit oet de strijd is gekomen en det we volgende weak op volle oorlogssterkte zien! En zoe neet, dan toch!

Noa de widstried in ut lokaal waas ut bepaald neet stil dus we kinne ut wel!

Till the next!

En hopelijk kinne we de irste thoeswidstried winnen en de irste 3 punten beajsjrieve. Voetballen kinne we zeker! Obtenir ces points! Allez les héros 3